BAGUIO CITY – Nasawi ang isang guro matapos magbanggahan ang dalawang motorsiklo sa national highway sa Brgy. Dagupan, Luna, Apayao.
Nakilala ang biktima na si Clifford Jamoyo, isang guro sa Pudtol Vocational High School, driver ng isa sa mga nasabing motorsiklo at residente ng Amado, Pudtol, Apayao.
Nakilala naman ang driver ng isa pang motorsiklo na si Andres Iddig, construction worker at residente ng Doña Loreta, Pudtol, Apayao.
Batay sa report, patungo sana si Jamoyo sa Luna, Apayao nang nakasalubong nito ang kumakaripas na motorsiklo na minaneho ni Iddig mula sa kabilang linya ng kalsada.
Inagaw ni Iddig ang linya ni Jamoyo na nagresulta sa banggahan ng dalawang motorsiklo at pagkakasugat ng dalawang drivers.
Naisugod sa pagamutan ang dalawang drivers ngunit naideklarang dead on arrival si Jamoyo habang nananatili sa pagamutan si Iddig.
