ROXAS CITY – Arestado ang dalawang suspek sa ikinasang drug buybust operation ng mga kasapi ng Provincial Drug Enforcement Unit ng Capiz Police Provincial Office at Station Drug Enforcement Team ng Roxas City Police Station sa Barangay Culajao, Roxas City.
Kinilala ang mga naaresto na sina Rommel Tiu, 29-anyos, residente ng naturang lugar at Loreto Delgado III, 39, residente ng Barangay Mongpong.
Narekober sa mga ito ang 7 sachets ng shabu na nagkakahalaga ng P390,000, P1,000 na buybust money, P18,000 na boodle money, cellphone at pouch.
Ayon kay Police Master Sergeant Ramil Arcangeles, tagapagsalita ng Roxas City PNP, matagal na nilang minomonitor ang iligal na aktibidad ng dalawa.
Aniya tumagal ng halos dalawang linggo ang kanilang monitoring bago ikinasa ang naturang operasyon.
Nakatakdang sampahan ang mga suspek ng kasong paglabag sa Republic Act 9165 o Comprehensive Dangerous Drugs Act of 2002.
