ROXAS CITY – Dumaan sa matinding audition ang mga kalahok para sa Handog ng Bombo Radyo at Star FM Battle of the Bands and Dance Showdown na gaganapin sa Capiz State University Main Campus Covered Gym sa Abril 12.
Ang naturang kompetisyon ay taunang isinasagawa ng Bombo Radyo at Star FM kasabay ng selebrasyon ng charter anniversary ng lalawigan ng Capiz na “Capiztahan.”
Pitong mga band groups ang magtatagisan ng kanilang talento sa Battle of the Bands habang 10 dance groups naman ang magpapamalas ng kanilang galing sa dance floor.
Kabilang sa kalahok na mga local bands ay ang “One Day Band,” “Cytoplasm,” “Simple Jammers,” “Albanda,” “Tobacco Bi Pipe,” “Cazhikami,” at “Calixsa.”
Kaabang-abang naman ang paghataw ng mga dance groups na kinabibilangan ng “One Crew,” “One Crew Jr.,” “Roxas Pride Crew,” “Ground Zero,” “Capiz Attraction,” “Caprox Collection,” “SNTD Crew,” “Junior Effects,”
“PRF Kids Iloilo,” at “King of Motion.”
Naghihintay sa mga mananalo ang naglalakihang papremyo ngunit hindi naman uuwing luhaan ang hindi papalarin dahil tatanggap naman ang mga ito ng consolation prizes.
Nabatid na ito na ang ikasiyam na taon na gagawin ang Handog ng Bombo Radyo at Star FM na may layuning makadiskubre pa ng mga lokal na talento.
