Hinamon ng mga pinuno ng Kamara de Representantes si Vice President Sara Duterte na tigilan na ang pag-iwas at magpaliwanag “under oath” kung saan nito ginastos ang milyun-milyong confidential funds, kabilang ang P15 milyong pondo na ginamitan ng sertipikasyon mula sa Armed Forces of the Philippines kahit na wala namang ibinigay na pondo sa kanila.
Noong Setyembre 18, humarap si Duterte sa pagdinig ng House Committee on Good Government and Public Accountability subalit tumanggi itong manumpa na magsasabi ng katotothanan kaugnay ng kinukuwestyong paggamit nito ng daang milyong halaga ng confidential funds.
Ito ay taliwas sa ginagawa ng mga iniimbitahan ng Kongreso. Matatandaan na kahit ang mga dating Pangulo na sina Joseph Estrada, yumaong Fidel Ramos, at yumaong Benigno “Noynoy” Aquino III ay nanumpa na magsasabi ng totoo ng humarap sa congressional investigation.
Sa pinakahuling pagdinig ng Committee on Good Government ay lumabas na ginamit ng ginamit ng Department of Education (DepEd), noong pinamumunuan pa ito ni Duterte ang sertipikasyon mula sa Armed Forces of the Philippines upang patunayan ang paggastos ng P15 milyong halaga ng confidential funds.
Pero ayon sa mga opisyal ng AFP na humarap sa pagdinig wala silang natanggap na pondo mula sa DepEd para sa pagsasagawa ng Youth Leadership Summits (YLS). Ang AFP at mga lokal na pamahalaan umano ang gumastos sa aktibidad na ito.
Ikinaalarma nina House Deputy Majority Leader Jude Acidre at House Assistant Majority Leader Paolo Ortega ang impormasyong ito na lumabas sa pagdinig.
Binanggit din ni Acidre na ang paggamit ni Duterte ng mga sertipikasyon mula sa AFP bilang batayan ng ginawa nitong paggastos ay nagbigay ng maling impormasyon sa mga auditor ng Commission on Audit (COA) at sa publiko.
Bukod pa rito, siniyasat din ng komite ang paggastos ng Office of the Vice President (OVP) ng P16 milyon para sa renta ng mga safe houses sa loob lamang ng 11 araw noong 2022.
Bagamat nagpatawag ng press conference noong Biyernes, hindi naman ipinaliwanag ni Duterte ang kinukuwestyong paggastos ng confidential funds ng kanyang tanggapan.
“We are still waiting for the Vice President to explain the need for 34 safehouses in less than two weeks. The public has a right to know why P16 million of their money was spent so dubiously,” ayon kay Ortega.
Ipinunto ni Ortega na ang hindi pagbigay ni Duterte ng malinaw na mga sagot tungkol sa mga safehouse at ang kahina-hinalang paggamit ng mga aktibidad ng AFP bilang pangtakip ay lalong nagpapa-init sa tanong kung sana napunta ang pondo.
Binigyan diin ng mambabatas ang kahalagahan na humarap sa si Duterte sa pagdinig, manumpa na magsasabi ng totoo at ihayag kung papaano nito ginastos ang pondo.
“If there’s nothing to hide, she should testify under oath. This is public money, and the Filipino people deserve transparency and accountability. No more evasions, no more squid tactics,” giit pa ni Ortega.
Sinabi naman ni House Assistant Majority Leader at Nueva Ecija Rep. Mika Suansing, “The ongoing investigations regarding the alleged misuse of OVP and DepEd funds under Vice President Duterte puts the Vice President’s leadership into question. Particularly concerning are the OVP disbursements, which the Commission on Audit has disallowed, and the alleged delivery of spoiled milk and nutribuns to public schools.”
Dismayado rin sina Acidre at Suansing sa mga pahayag ng Bise Presidente sa publiko na nagmungkahing ituon na lamang ang pansin sa mga suliraning kinakaharap ng bansa sa halip na makialam sa pulitikang nagdudulot ng pagkakahati.
“We implore the Vice President to instead focus on working with all of us for the welfare of the Filipino people,” saad naman ni Suansing.
Pinuri naman ni Acidre si Pangulong Marcos Jr. sa kanyang pamumuno sa bansa sa kabila ng mga hamong minana mula sa mga nakaraang administrasyon, at sa pagtuon ng atensyon nito sa paghahanap ng solusyon sa halip na manisi.
Hinihikayat niya ang Bise Presidente na isantabi ang alitang pulitikal at makilahok sa mga hakbang na tunay na makapagpapabuti sa kalagayan ng mga Pilipino.
Pinaalalahanan din ng mambabatas ang lahat ng mga public official, kasama na ang Bise Presidente, tungkol sa kanilang sama-samang tungkulin na magsilbi para sa kapakanan ng publiko.
