Isang buwan matapos magpalit ng House Speaker, malaking balasahan sa liderato ang nangyari sa sesyon nitong araw ng Miyerkules.
Inalis kasi bilang House deputy speakers sina Batangas Rep. Raneo Abu, Capiz Rep. Fredenil Castro at Laguna Rep. Dan Fernandez.
Ang tatlo ay kilalang kaalyado ni dating speaker at kasalukuyang Tagui-Pateros Rep. Alan Peter Cayetano.
Sina Cagayan de Oro Rep. Rufus Rodriquez, Las Pinas Rep. Camille Villar at Buhay Rep. Lito Atienza, na kaalyado naman ni Velasco, ang pumalit sa kanila bilang mga bagong deputy speakers.
Napili naman bilang bagong chairman ng House Committee on Energy si Pampanga Rep. Mikee Arroyo.
Ang naturang komite ay dating hawak ni Velasco.
Pinalitan din ni Caloocan Rep. Dale Malapitan si Kabayan Rep. Ron Salo bilang pinuno ng House contingent sa House of Representative Electoral Tribunal
Napunta naman si ACT-CIS Rep. Eric Yap, na kasalukuyang chairman ng House Committee on Appropriations, bilang bagong vice chairman ng House Committee on Accounts.
Matapos magbitiw, pinalitan ni dating Batangas Rep. Mark Llandro Mendoza si Atty. Jocella Bighani Sipin bilang House Secretary-General.
