Hindi napigilan ng ina ni Maine Mendoza na maging emosyonal nang tuluyang dumulog sa tanggapan ng National Bureau of Investigation (NBI)-Cyber Crime Division kaugnay ng kumalat na video scandal umano ng aktres kamakailan.
Ngayong araw, December 28, nang magtungo sa NBI ang ina ni Maine na si Mrs. Mary Ann Mendoza kasama ang abogado ng 25-year-old TV host-actress para paimbestigahan ang kumakalat na sex video.
Hiling ng kampo ni Maine na maparusahan ang nasa likod ng pagpapakalat ng pekeng malaswang video.
Ito’y bagama’t una nang inamin ng girlfriend ni Arjo Atayde na kamukha niya ang babae sa video ngunit edited na raw gamit ang tinatawag na deepfake technology.
“Lumagay man kayo sa ‘min bilang magulang, siguro mararamdaman niyo rin yung sakit, yung nararamdaman naming mga pamilya niya,” naiiyak na sambit ng nakatatandang Mendoza.
Sa panig ng NBI, nangako ang Cyber-Crime Investigator na si Victor Lorenzo na masusi silang mag-iimbestiga kaugnay ng isyu.
