Inaasahang mananatiling mataas ang inflation ngayong buwan sa gitna ng patuloy na paghihigpit sa supply sa ilang mga pagkain at mas mataas na gastos sa utility, ayon sa Bangko Sentral ng Pilipinas (BSP).
Ayon kay Bangko Sentral ng Pilipinas Senior Assistant Governor for the Monetary Policy Sub-sector Iluminada Sicat, ang inflation print noong Pebrero ay tinatayang nananatiling mataas.
Kung matatandaan, nakita ng Pilipinas ang inflation rate sa 8.7% noong Enero na isang pagbilis na ikinagulat ng mga economic managers.
Ito ay isang fresh 14-year high o ang pinakamabilis na inflation print mula noong 9.1% na naitala noong Nobyembre 2008.
Sinabi ni Sicat na inaasahan pa din ang pagtaas ng inflation para sa Pebrero dahil sa pagtaas ng utility rate ng bansa.
Gayunpaman, sinabi ng opisyal ng Bangko Sentral ng Pilipinas na may inaasahang pagbuti sa inflation sa isang month-on-month basis.
Sa gitna pa rin ng mataas na inflation trend, naghahanda ang gobyerno ng Pilipinas na maglunsad ng panibagong round ng cash aid sa ilalim ng Targeted Cash Transfer (TCT) program para makatulong sa pagpapagaan ng pasanin ng mga mamimili at mamamayang Pilipino.
Sa ilalim ng panukalang cash aid program, may 9.3 milyong “poorest of the poor” ang tatanggap ng P1,000 na hahatiin para sa pamamahagi sa loob ng dalawang buwan.
Para sa bahagi nito, sinabi ni Sicat na gagamitin ng BSP ang lahat ng magagamit na mga tool upang patatagin at ibalik ang trend ng inflation sa target range.
Target ng gobyerno na ma-settle ang inflation sa loob ng 2% hanggang 4% ngayong taon.
Nakatakdang ilabas naman ng Philippine Statistics Authority ang opisyal na inflation figures para sa Pebrero sa March 7, 2023.
