Isa patay at 1 sugatan nang bumangga sa punong kahoy ang motorsiklo sa Magpet Cotabato

CENTRAL MINDANAO-Patay on the spot ang isang motorista at sugatan ang kanyang angkas sa vehicular crash sa Magpet Cotabato.

Nakilala ang nasawi na si Aurie Sibonga at sugatan si alyas Totong mga residente ng Barangay Alibayon Magpet Cotabato.

Ayon sa ulat ng pulisya na matulin umano ang takbo ng motorsiklo na sinakyan ng mga biktima at pagsapit nito sa Barangay Gubatan sa bayan ng Magpet ay nag-overshoot sa pakurbadang bahagi ng kalsada at diritsong bumangga sa puno ng kahoy.

Agad binawian ng buhay si Sibonga nang mabasag ang ulo at nagkabali-bali ang katawan habang naisugod sa pagamutan ang kanyang kasama.

Paalala ng LGU-Magpet sa mga nagmamaneho ng sasakyan na mag-ingat para ligtas na makaabot sa pupuntahan.