Malalaman umano ngayong linggo kung matutuloy ba o hindi ang nilulutong bakbakan sa pagitan nina Sen. Manny Pacquiao at Terence Crawford.
Ayon kay Top Rank Promotions CEO Bob Arum, mayroon daw investor na handang maglabas ng pera para sagutin ang napakamahal na site fee matuloy lamang ang nasabing megafight.
“Somebody is willing to spend big money to get the Crawford-Pacquiao fight and the site fee, that then distorts everything,” wika ni Arum.
Kung maaalala, nasa pangangalaga ni Arum si Pacquiao bago ito kumalas sa Top Rank noong 2017.
Una rito, humingi ang Fighting Senator ng $40-million para sa laban nito kay Crawford.
Maliban kay Crawford, inihayag pa ni Arum na ilan pa sa posibleng makaharap ni Pacquiao ay sina unified welterweight champion Errol Spence at si Mikey Garcia.
