BAGUIO CITY – Nahaharap na sa kasong paglabag sa RA 9165 o Comprehensive Dangerous Drugs Act of 2002 ang isang kargador at kasama nitong menor de edad matapos makumpiska sa kanila ang mga marijuana oil sa isinagawang checkpoint operation sa Callagdao, Tabuk City, Kalinga.
Nakilala ang kargador na si Reynante Bulatao Bulayang, 25, may asawa at ang kasama nitong menor de edad na parehong residente ng Binongsay, Malin-awa, Tabuk City, Kalinga.
Ayon sa Tabuk City Police Station, isinagawa ng mga otoridad ang checkpoint operation laban da dalawa.
Resulta ito ng natanggap nilang impormasyon mula sa isang concerned citizen ukol sa pagbiyahe ng dalawang suspek ng iligal na droga sa pamamagitan ng itim na motorsiklo.
Nakumpiska mula kina Bulayang ang dalawang 15 ml na botelya na naglalaman ng pinaniniwalaang marijuana oil.
Napag-alaman din na ang dalawa ay mga bagong identified drug personalities sa Kalinga.
