Arestado ng mga tauhan ng Philippine National Police – Anti Kidnapping Group (PNP-AKG) ang isang kidnap for ransom suspect sa Marawi City.
Kinilala ni PNP-AKG director B/Gen. Jonnel Estomo ang suspek na si Michael Estanol na naaresto sa Brgy. Matampay sa bisa ng warrant of arrest na inilabas ng Ginoog City RTC.
Kasalukuyang nahaharap sa kasong murder si Estanol dahil sa pagpatay nito sa negosyanteng si Ernesto Rementizo noong taong 2018.
Nabatid na sangkot din ang suspek sa kidnap for ransom activities sa ilalim ng grupo ni Ibrahim Langco Salic kung saan tinatarget ang mga negosyante hindi lamang sa Marawi City kung hindi sa buong Mindanao.
Sinasabing sangkot din si Estanol sa iba pang iligal na mga aktibidad tulad ng gun-for-hire at extortion sa Ginoog City sa Misamis Oriental at nagpapanggap umano ito bilang construction worker.
Kasalukuyang nasa kustodiya na ng PNP-AKG sa Mindanao ang suspek.
