KALIBO, Aklan — Arestado ng pinagsanib na pwersa ng mga operatiba ng Malay Police Station Special Drug Enforcement Unit, 2nd Aklan PMFC Intel at PDEA-Aklan ang isang suspek na kusinero na tulak ng iligal na droga sa isinagawang drug buy-bust operation alas-12:15, Lunes ng madaling araw sa Brgy. Manocmanoc sa isla ng Boracay.
Kinilala ang suspek na si Mark Andrew Panganiban, alyas ‘Boknoy’, 28, tubong Quezon City at kasalukuyang nakatira sa Sitio Lugutan, Manocmanoc, Boracay.
Base sa report, nabilhan ang suspek ng dalawang transparent plastic sachet ng pinaghihinalaang shabu kapalit ng P1,600 sa nagpanggap na poseur buyer at nang magpositibo ang transaksyon ay agad na inaresto ang suspek na kusinero.
Narekober sa posisyon ng suspek ang dagdag na tatlo pang sachet ng iligal na droga.
