CENTRAL MINDANAO-Nagkasagupa ang mga tauhan ng Bangsamoro Islamic Armed Forces-Moro Islamic Liberation Front (BIAF-MILF) at ISIS Inspired Group sa lalawigan ng Maguindanao Del Sur.
Ayon kay Eastern Mindanao Front Chief at BTA-BARMM Member of Parliament Akmad Abas Alhadj Alyas Commander Jack na nagsagawa sila ng pursuit operation laban sa ISIS-BIFF Inspired Group sa Liguasan Delta sa Sitio Baongkong Barangay Dungguan Datu Montawal Maguindanao Del Sur.
Papasok pa lang ang BIAF-MILF Forces ay pinaputukan na sila ng mga terorista.
Tumagal ng ilang minuto ang palitan ng putok sa magkabilang panig gamit ang mga matataas na uri ng armas.
Umatras ang mga myembro ng ISIS Inspired Group nang dumating ang karagdagang pwersa ng MILF.
Wala namang nasugatan sa MILF habang hindi matiyak sa mga rebelde.
Nakubkob ng MILF ang kuta ng mga terorista at narekober ang mga matataas na uri ng mga armas.
Una nang nagsilikas ang mga residente ng Sitio Baongkong at Sitio Matiompong Brgy Dungguan matapos ang halos isang buwang bakbakan ng magkalabang grupo kaya pinasok na ito ng Eastern Mindanao Front ng MILF.
Matatandaan na unang namahagi ng tulong ang LGU-Datu Montawal sa pamumuno ni Mayor Datu Otho Montawal sa mga bakwit.
Sa ngayon ay patuloy na tinutugis ng BIAF-MILF ang ISIS Inspired Group sa bayan ng Datu Montawal.
