KORONADAL CITY – Nadiskubre ng militar ang pinaniniwalaang kuta ng local terrorist group sa Maguindanao habang nagsasagawa ng clearing operation sa Brgy. Kilalan, Talitay, Maguindanao.
Ayon kay Maj. Arvin Encinas, spokesman ng 6th Infantry Division, Philippine Army, natagpuan ng mga sundalo sa lugar ang ilang empty shells ng high powered firearms, bandolier, camouflage uniforms, ICOM radio at mga bala ng .50-caliber.
Naniniwala naman si Encinas na nagawa nilang maitaboy ang mga armado palayo sa mataong lugar upang walang madamay na mga sibilyan.
Tiwala rin ang opisyal na tuluyan nang umatras ang naturang armadong grupo matapos na makuha ng mga sundalo ang ilan sa kanilang mga armas at mga bala.
Tiniyak naman ng opisyal na patuloy nilang tutugisin ang naturang grupo na banta sa seguridad ng buong lalawigan.
