Tinambakan ng Los Angeles Lakers ng 38 points ang Washington Wizards sa paghaharap nila ngayong araw(Jan. 31), 134 – 96.
Mistulang easy-win para sa Lakers ang laban at agad nagposte ng 33 points sa pagtatapos ng 1st half ng laban.
Pinangunahan muli ng 40 anyos na si Lebron James ang kaniyang koponan at nagbuhos ng 24 points, 11 assists. Kumamada naman ng 22 points ang reserve forward na si Rui Hachimura habang 21 points ang ipinasok ni Shake Milton.
Lalo pang bumagsak ang Wizards sa 6 – 41 win-loss record dahil sa naturang pagkatalo.
Naging malamiya kasi ang opensa ng koponan at wala ni isa sa kanila ang nakagawa ng 20-point performance. Tanging 19 points ang naipasok ng NBA champion na si Jordan Poole.
Umangat na sa 27 – 19 ang kartada ng Los Angeles Lakers kasunod ng laban at kasalukuyang No. 5 sa Western Conference.
