ROXAS CITY – Nagtamo ng matinding sugat ang isang lalaki matapos matuhog ng bumangga ang minamaneho nitong motorsiklo sa isang truck na may mga kargang kawayan sa Brgy. Lawaan Roxas City.
Kinilala ang biktima na si Reymark Singular, tatlumpo’t tatlong taong gulang at residente ng Barangay San Jose ng nasabing lungsod.
Sa panayam ng Bombo Radyo Roxas kay PLt. Col. Francisco Paguia Hepe ng Roxas City PNP ibinahagi nito na batay sa kanilang isinagawang imbestigasyon nakasunod anya ang biktima sa nasabing truck at pagdating sa lugar na pinangyarihan ng aksidente ay nagtangka umanong mag-overtake ang biktima ngunit nawalan ito ng kontrol sa manibela at dumiretso ito sa likuran ng nasabing truck.
Dahil dito ay natuhog ang kaliwang hita ng biktima sa kargang kawayan ng truck at nawalan ng malay.
Mabilis namang rumesponde ang mga personnel ng Roxas City Emergency Response Team at binigyan ng paunang lunas ang biktima at kaagad din na sinugod sa pinakamalapit na ospital.
Dagdag naman ni Paguia, na batay naman sa mga nakasaksi sa nasabing aksidente nasa impluwensya umano ng alak ang biktima.
Sa ngayon ay nasa kustodiya na nga Roxas City PNP ang mga involved na sasakyan pati na ang driver ng nasabing truck habang nagpapatuloy ang imbestigasyon.
