ROXAS CITY – Patay ang hindi pa nakilalang biktima matapos pagbabarilin at nasunog sa loob ng kanyang sasakyan sa Mabini corner Mejorada, Barangay Inzo Arnaldo Village, Roxas City sa lalawigan ng Capiz.
Sa impormasyon na nakuha ng Bombo Radyo Roxas, habang nagpapatrolya ang isang TMU personnel sa lugar, nakita nito ang biktima sa loob ng umuusok na sasakyan.
Dahil dito mabilis itong tumawag ng responde sa BFP-Roxas City at makalipas ang 10 minuto biglang sumiklab ang apoy sa sasakyan.
Ang sasakyan ay isang Mitsubishi Pajero kulay itim at may plate number na XAM 778.
Una rito, nakarinig ng sunod-sunod na putok ng baril si Brgy. Kgwd Ervin Sicad, at ng pinuntahan nito ang lugar, nasaksihan nito ang nasusunog na sasakyan habang nasa loob ang biktima.
Sa ngayon nagpapatuloy pa ang imbestigasyon ng mga kapulisan para matukoy kung ano ang motibo sa pagpatay sa hindi pa nakikilalang biktima samantala inaalam pa kun ano ang pinagmulan ng apoy sa naturang sasakyan.
