Lalaki, patay matapos malunod sa Catbalogan Samar

TACLOBAN CITY – Patay ang isang lalaki matapos itong malunod sa Bangon Falls Brgy. San Andres, Catbalogan, Western Samar.

Kinilala ang biktima na si Edgar Bakaltos, 49 taong gulang at residente ng nasabing barangay.

Ayon kay Petty Officer 3rd Class Arnold Latoha, Chief Master at Arms ng Coast Guard Station ng Western Samar, kasama ng biktima ang kanyang pamilya na naliligo at nag-iinuman sa nasabing falls.

Habang naliligo ang biktima ay aksidente itong nadulas sa inaapakang bato na naging dahilan para ito ay mahulog at mahirapang makalangoy.

Nabatid na umabot muna ng isang araw bago marekober ang bangkay ng biktima dahil inanod ito ng malakas na tubig sa falls.