Lalaki sa Iloilo, patay matapos walang habas na pinagtataga ng karelasyon ng kanyang ina

ILOILO CITY- Patay ang isang lalaki matapos pinagtataga ng karelasyon ng kanyang ina sa Barangay Lanag Norte, Tubungan, Iloilo.

Ang biktima ay si Patrick Casquite, 29, at ang suspek naman ay si George Tacan, pawang residente ng nasabing lugar.

Sa panayam ng Bombo Radyo Iloilo kay Police Captain Rodel Ojano, Chief of Police ng Tubungan Municipal Police Station, sinabi nito na nag-inuman ang dalawa sa bahay mismo ng biktima.

Ayon kay Ojano,nagkaroon ng pagtatalo sa pagitan ng dalawa hanggang sa tinaga ng suspek ang biktima gamit ang itak.

Dinala pa ang biktima sa ospital, ngunit dineklarang dead on arrival.

Sa ngayon, nakakulong na ang suspek matapos sumuko sa pamamagitan ng Punong Barangay ng kanilang lugar.