(Update) BACOLOD CITY – Hinihinalang may kinalaman sa iligal na droga ang pagpatay sa isang lalaki na natagpuan sa loob ng sasakyan sa Talisay City, Negros Occidental.
Tadtad ng bala at wala ng buhay ang isang hindi nakilalang biktima nang madiskubre sa loob ng isang Toyota Vios sa Purok Tumpok, Barangay Zone 15, Talisay City kahapon ng hapon.
Sa panayam ng Bombo Radyo Bacolod kay Staff Sgt. Edmundo Jomocan Jr., imbestigador ng Talisay City Police Station, dakong alas-3:49 ng hapon nang makatanggap sila ng tawag na may patay sa nasabing lugar.
May apat na tama ng bala sa likod at tig-isa sa dalawang kamay ang biktima.
Tinitingnan ng imbestigador na may kinalaman sa droga ang pagpatay sa biktima dahil kilalang drug den ang lugar.
Malaki rin aniya ang posibilidad na mga kasamahan lang din mismo ng biktima ang bumaril dito dahil nasa likod ito ng drivers seat ng matagpuan na nangangahulugan na may ibang driver ang sasakyan.
Sa ngayon ay iniimbistigahan din ng pulisya ang kinalaman ng unang nai-report na shooting incident sa Brgy. Zone 9 nasabing lungsod kung saan sinasabing sangkot ang isang puting van at isang Toyota Vios.
