Naglabas na ng listahan ang PNP-Firearms and Explosives Office (FEO) ng mga ipinagbabawal na paputok, tatlong linggo bago ang pagdiriwang ng Pasko at Bagong Taon.
Ito’y para magsilbing babala sa publiko habang maaga at hindi na tangkilikin ang mga ipinagbabawal na paputok na nakalulusot sa merkado.
Ayon kay PNP-FEO Spokesperson C/Insp. Domer Tadeo, bawal ang mga overweight, oversized, gayundin ang mga imported na paputok.
Masasabi aniyang overweight o sobra sa bigat ang isang paputok kung mahigit one-thirds na kutsaritang pulbura ang laman nito; oversized kung maikli o sobrang haba ng mitsa; at imported kung walang label.
Kabilang sa mga ipinagbabawal na paputok ay ang “Piccolo,” “Super Lolo,” “Atomic Triangle,” “Judas Belt,” “Bawang,” “Pillbox,” “Bosa,” “Goodbye Philippines,” “Bin Laden,” “Mother Rocket,” “Lolo Thunder,” “Coke in can,” “Atomic Bomb,” “Five Star,” “Pla-Pla,” “Giant Whistle Bomb” at “Kabasi,” lalo na ang “Watusi.”
Maaari namang sindihan sa mga itinalagang firecraker zones ang “Baby Rocket,” “Paper Caps,” “Pulling of Strings,” “Sky Rocket” o “Kuwitis” at “Small Triangulo.”
Habang ang mga maaaring sindihan sa labas ng firecracker zone ang “Butterfly,” “Fountain,” “Jumbo Regular,” “Special Luces,” “Mabuhay,” “Roman Candle,” “Sparklers,” “Trompillo,” “Whistle Devices” at iba pang klaseng pailaw.
Paalala ni Tadeo, huwag bumili ng mga bawal na paputok upang hindi madisgrasya habang ang mga mahuhuling nagtitinda ay tatanggalan ng lisensya at kukumpiskahin ang paninda.
