NAGA CITY- Halos madurog ang ulo ng isang lolo matapos masagasaan ng isang trailer truck sa Planza, San Fernando, Camarines Sur.
Kinilala ang biktima na si Danilo Espina, 67-anyos.
Sa panayam ng Bombo Radyo Naga kay PLt. Sheralyn Samonte, Deputy Chief of Police ng San Fernando-PNP, sinabi nitong base sa pamilya ng biktima pula sa Pamukid ang matanda at pauwi na sana habang sakay ng kanyang bisekleta.
Ngunit dahil sa madulas na kalsada, natumba ang sinasakyan ng biktima hanggang sa nasagasaan ito ng nakasunod na trailer truck na minamaneho ni Jonald Macalala, 33-anyos.
Kaugnay nito, nagtamo ng malalang tama sa ulo si Espina na naging dahilan ng agarang kamatayan nito.
Sa ngayon, nananatili na sa kustodiya ng mga otoridad ang driver ng truck habang hinahanda na ang kasong isasampa laban dito.
