LEGAZPI CITY- Trending ngayon sa social media ang mag-asawang Pecson na kwelang ipina-imprenta ang kanilang vaccination card sa T-shirt upang hindi na kumuha pa ng kopya nito tuwing papasok sa mga malls at iba pang pampublikong gusali.
Sa video na nakalikom na ng ilang libong views online makikita si Jhemel Pecson na pumasok sa mall suot ang T-shirt at ang guard na hindi na napigilang matawa ng makita kung saan ang vaccination card nito.
Sa panayam ng Bombo Radyo Legazpi kay Melissa Sue Pecson, naisipan lamang umano nilang ipaimprenta na lang sa susuoting damit ang card upang hindi na mahirapan pang maghalongkat sa bag at wallet upang ipresenta ito tuwing papasok sa mga malls.
Epektibo naman umano ang kanilang naisip na paraan lalo pa’t napayagan naman sa lahat ng gusaling kanilang pinasokan at nagpangiti pa ang ibang nakakita.
Paglilinaw naman nito na dala pa rin nila ang orihinal na kopya ng vaccination card sakaling hingan parin habang hindi naman umano gaanong kahigpit ang mga guard sa paghingi ng kopya nito na maari pa ngang ipakita gamit lamang ang kuhang larawan sa cellphone.
