Magnanakaw ng underwear, arestado sa Capiz

ROXAS CITY – Arestado ang 57-anyos na lalaki sa pagnanakaw ng mga underwear at bra sa Barangay Culasi, Roxas City.

Kinilala ang suspek na si Armando Villar, dating security guard ng Culasi Elementary School.

Sa panayam ng Bombo Radyo Roxas kay May Necesario, barangay secretary ng Barangay Culasi, sinabi nito na inireklamo si Villar ng mag-inang naka-akto ng pagpasok nito sa kanilang bahay at pagnanakaw ng panty at bra sa sampayan.

Dahil dito ay kaagad pinuntahan ng mga opisyales at CVO ang bahay ng suspek kung saan, nakita pa sa loob ng bag ang maraming mga underwear at bra na ninakaw nito.

Maliban dito nakita rin sa bahay ni Villar ang .38 caliber revolver.

Napag-alaman na walang asawa ang suspek at diumano may pagka-manyakis ito.