KORONADAL CITY – Nagpapatuloy sa ngayon ang imbestigasyon ng pulisya sa nangyaring pamamaril sa bayan ng Libungan, North Cotabato na nagresulta sa pagkamatay ng isang magsasaka at malubhang pagkasugat ng isa pa.
Kinilala ng Libungan PNP ang nasawi na si Laping Barat, 35 anyos, taga Barangay Sinapangan, Libungan habang sugatan naman si Lencio Paciones, 60 anyos na residente ng Barangay Gumaga.
Ayon sa mga otoridad, pasado alas dyes ng umaga nang mangyari ang insidente habang nasa sakahan ang dalawa nang pagbabarilin ng hindi pa nakikilalang suspek gamit ang di pa natukoy na uri ng baril.
Sa inisyal na imbestigasyon, posibleng galit at paghihiganti ang motibo sa pamamaril sa dalawa dahil bago nangyari ang insidente ay pinatay umano ni Paciones ang apat na mga kambing na kumakain ng kanilang mga pananim sa kanilang sakahan.
