Mahigit 1,700 na bumbero ang nagtulong-tulong sa pinakamalaking sunog sa kagubatan ng Japan.
Ayon sa mga opisyal tinatayang 4,600 na residente ang nananatili sa ilalim ng mga advisory para sa agarang pagpapalikas habang patuloy inaapula ng pamahalaan ang apoy.
Ang sunog, na sumiklab sa hilagang bahagi ng Iwate region ng Japan ay kumitil ng isang buhay mula nang magsimula ito noong nakaraang linggo.
Samantala tinatayang aabot naman sa 2,100 ektarya ang tumupok sa Ofunato, mula noong Huwebes, ayon ‘yan sa datos ng Fire and Disaster Management Agency. Bilang tugon, nagsanib pwersa ang mga bumbero mula sa 14 na rehiyon, kabilang ang Tokyo, at 16 na helicopter, kasama na ang mga unit ng militar, upang sugpuin ang nagngangalit na apoy.
Hanggang nitong weekend, 84 na mga gusali na ang nasira ng sunog, ngunit patuloy pa rin ang pagsusuri sa kalagayan ng mga nasirang ari-arian.
Batay sa tala ng ahensya tinatayang 2,000 katao na ang lumikas sa lugar na pinili namang tumira sa kanilang mga kaibigan at kamag-anak habang mahigit 1,200 katao ang nanatili sa mga evacuation center.
Bagamat bumaba ang bilang ng mga wildfires sa Japan mula noong dekada 1970 mayroon namang humigit-kumulang 1,300 sunog ang naitala ng bansa noong 2023. Kadalasan, ang mga sunog na ito ay nangyayari mula Pebrero hanggang Abril, sanhi ng dry air at malalakas na hangin.
Kaugnay nito isa pa sa mga tinitignang dahilan kung bakit lumalala ang sunog sa Ofunato ay dahil umano sa matinding pagbaba ng pag-ulan noong buwan ng Pebrero, kung saan 2.5 millimeter (0.1 pulgada) lamang ang naitalang ulan sa lugar, kumpara sa karaniwang 41 millimeter para sa buwang iyon.
Kung saan ito na ang bagong record na pinakamahabang panahon ng hindi pagulan sa lugar, simula noong 1967.
