Karamihan sa mga taong lumikas dahil sa Taal eruption noong Enero 2020 ay nakauwi na sa kanilang mga tahanan ngunit 1,057 pamilya ang naghihintay pa rin para sa kanilang permanenteng relokasyon, sinabi ng Department of Social Welfare and Development (DSWD).
Batay sa pinakahuling ulat ng DSWD Field Office sa CALABARZON (Cavite, Laguna, Batangas, Rizal, Quezon), ilang pamilya ang nananatili pa rin sa mga transition house na suportado ng kanilang kinauukulang local government units (LGUs) at ng pamahalaang panlalawigan ng Batangas.
Sinabi ng DSWD na nasa 172 pamilya ang kasalukuyang tumira sa motor pool ng lokal na pamahalaan ng Talisay at naghihintay na matapos ang pagtatayo ng kanilang mga permanenteng bahay.
Habang hinihintay ang pag-apruba ng kanilang permanenteng relokasyon, nasa 300 pamilya rin ang nananatili sa Tent City sa Balete, Batangas.
Sinabi ng DSWD na 585 pamilya mula sa Ibaan, Batangas ang naghihintay din ng pag-apruba sa relocation site kung saan itatayo ang kanilang mga permanenteng bahay.
Dagdag pa rito, nabigyan ng emergency shelter assistance ang mga apektadong pamilya na umaabot sa mahigit P19 milyon.
Samantala, nakabalik na sa kanilang mga tirahan ang mga lumikas na pamilya na naapektuhan sa Taal Volcano unrest noong Hulyo 2021 sa parehong buwan nang ibinaba ang alert level.
Binigyan sila ng mahigit P16 milyong halaga ng tulong ng DSWD, mga kinauukulang LGU, at non-government organizations.
