TUGUEGARAO CITY-Nakasabat ang mga otoridad ng sako-sakong marijuana na nagkakahalaga ng mahigit P29m sa bayan ng Lubuagan, Kalinga.
Ayon kay PCAPT Ruff Manganip, tagapagsalita ng Kalinga PNP, nang harangin sa checkpoint ang isang kulay itim na Innova ay agad itong pinaharurot ng driver at sinubukang takasan ang mga otoridad.
Hinabol na mga pulis ang sasakyan at nang makarating sa New Balbalan, Lacnog East, Tabuk City ay iniwan na ng suspek ang kanyang sasakyan at agad na kumaripas ng takbo palayo sa mga otoridad.
Nang buksan ang sasakyan ay tumambad sa mga otoridad ang saku-sakong marijuana at sa loob ng mga sako ay nakuha ng pulisya ang 214 na piraso ng mga marijuana bricks at isang tubular marijuana na may timbang na 242 kilograms.
Sa ngayon ay patuloy na iniimbestigahan ng pulisya kung sino ang nagmamay-ari ng nasabing sasakyan at upang matukoy ang pagkakakilanlan ng tumakas na driver.
