Nirerespeto ng Malakanyang ang mapayapang pagtitipon ng mga kapatid nating Iglesia ni Cristo (INC) ngayong araw.
Ayon kay Executive Secretary Lucas Bersamin ang peace rally ay karapatang ginagarantiyahan ng Konstitusyon, pinahahalagahan ng mga tao at kinikilala ng administrasyon ni Pang. Ferdinand Marcos Jr.
Kumpiyansa ang Palasyo na magiging mapayapa, matiwasay at makabuluhan ang National Rally for Peace.
Sinabi ni Bersamin, umaasa ang Malakanyang na ang mga ipapahayag na mga opinyon sa gawaing ito ay makakatulong sa paglilinaw sa mga usaping kinakaharap ng bansa at maghahatid sa atin sa tunay na pagkakaisa.
Binigyang diin ni Bersamin ang kahalagahan ng pagkilatis at pakikinig sa lahat ng panig sa isang usapin na aniya’y siyang magdudulot ng kalinawan na hinahanap.
Nakikita anya nila ang pagtitipon ngayon bilang bahagi ng “national conversation” na dapat ginagawa ng mga tao para magkaroon ng kaliwanagan at pagkakaisa sa mga isyung kinakaharap ng lahat at makaaapekto sa hinaharap.
Kaugnay nito’y inatasan naman ang kaukulang mga ahensya ng gobyerno kabilang ang nasa peace and order, traffic and transportation management gayundin ang emergency health services, na umalalay para sa kakailanganing tulong ng mamamayan.
Sa kabilang dako, mahigpit din ang seguridad na ipinatupad ng National Capital Region Police Office (NCRPO) upang mapanatili ang kaayusan.
Nagdeploy din ang PNP ng mga pulis sa paligid ng Malakanyang.
