Nasa 27 Opisyal ng Philippine National Police (PNP) ang isinailalim sa malawakang balasahan.
Ayon kay PNP Chief Gen. Debold Sinas epektibo bukas, December 1,2020 ang reshuffle.
Paliwanag ni Sinas ang reshuffle ay bunsod sa napipintong pagretiro ng pitong heneral na hiniling na mag non-duty status habang hinihintay ang kanilang retirement day ngayong buwan.
Inilipat sa Office of the Chief PNP si P/MGen. Celso Pestaño mula sa Directorate for Information and Communications Technology Management (DICTM).
Papalitan si Pestaño sa DICTM ni P/BGen. Albert Ferro mula sa Police Regional Office 7 Central Visayas.
Mula naman sa Quezon City Police District (QCPD) itinalaga si P/BGen. Ronnie Montejo bilang incoming Regional Director ng Central Visayas PNP kapalit ni Ferro.
Inilipat naman sa Directorate for Plans si P/BGen. Rene Pamuspusan ang kasalukuyang regional police director ng Police Regional Office 6 Western Visayas, papalitan siya ni P/BGen. Rolando Miranda ang District Director ng Manila Police District (MPD).
Itinalaga naman sa Police Regional Office 9 Zamboanga Peninsula si P/BGen. Rolando Ylagan ang District Director ng Northern Police District kapalit ni P/BGen. Jesus Cambay na itinalaga bilang DIPO Southern Luzon na pumalit kay P/MGen. Jonas Calleja na nailipat din sa Office of the Chief PNP.
Mula naman sa NCRPO, inilipat si P/BGen. Ronald Olay sa Directorate for Operations (DO) habang si P/BGen. Antonio Yarra ay inilipat mula NCRPO patungong Police Regional Office 4A CALABARZON.
Mula naman sa Office of the Chief PNP, inilipat naman sa Directorate for Plans si P/BGen. Walter Castillejos habang balik naman sa NCRPO si P/BGen. Eliseo Cruz.
Inilipat naman sa DICTM si P/BGEn. Armado De Leon mula sa Directorate for Human Resource Doctrine and Development at papalitan ito ni P/BGen. Herminio Tadeo Jr na siya namang papalit kay De Leon.
Mula sa DIPO Southern Luzon, inilipat sa Office of the Chief PNP si P/BGen. Mario Rariza Jr.
Inilipat naman si P/BGen. Wilfredo Cayat mula sa Philippine National Police Academy (PNPA) patungo sa Office of the Chief PNP.
Napunta naman sa PNP Communications and Electronic Services si P/BGen. Conrado Pajarillo Gungon Jr. mula sa Directorate for Integrated Police Operations o DIPO sa Western Mindanao.
Pinalitan ni Gungon si P/BGen. Joey Runes sa Communications and Electronic Services na napunta naman sa Office of the Chief PNP.
Mula naman sa Directorate for Operations, inilipat si P/BGen. Danilo Macerin sa National Capital Region Police Office o NCRPO kapalit ni P/BGen. Ronald Olay na inilipat din sa Office of the Chief PNP.
Maliban sa mga Heneral, may pito pang Opisyal na may ranggong Colonel ang itinalaga sa bago nilang pwesto, kabilang dito ang dating tagapagsalita ng PNP na si PCol. Ysmael Yu.
Binigyang-diin ni Sinas na ang nangyaring balasahan ay consesus ng command group kung saan lahat ng opisyal ay kinunsulta.
