ROXAS CITY – Arestado ang isang marine fresh graduate sa ikinasang drug buy bust operation ng Provincial Drug Enforcement Unit (PDEU) sa Barangay Sublangon, Pontevedra, Capiz.
Kinilala ang suspek na si Ramzelle Baclor, 22-anyos ng Barangay Malag-it sa naturang bayan.
Sa panayam ng Bombo Radyo kay Police Lt. Col. Julius Balano, inihayag nito na mula pa noong Enero ngayong taon nang kanilang isinailalim sa monitoring ang suspek.
Itinuturing na newly-identified drug personality ang suspek na kumukuha pa umano ng suplay ng iligal na droga sa Lungsod ng Roxas.
Narekober sa suspek ang dalawang sachet ng pinaniniwalaang shabu, P1,000 na marked money, at P400 na personal nitong pera.
Nahaharap na ito sa kasong paglabag sa Republic Act 9165 o Comprehensive Dangerous Drugs Act of 2002.
