Tiniyak ng Department of Social Welfare and Development (DSWD) ang mas mahigpit na protocols sa paggamit ng Ayuda para sa Kapos ang Kita (AKAP) program para hindi magugol sa maling paraan sa panahon ng halalan.
Kaugnay nito, sinabi ni DSWD Secretary Rex Gatchalian na nakikipagtulungan ang ahensiya sa Department of Labor and Employment (DOLE) at National Economic Development Authority (NEDA) para mapaigting pa ang mga guideline at masigurong nakalatag ang safeguards para maiwasan ang misuse ng mga pondo.
Sa kasalukuyan, ayon sa kalihim, isinasailalim pa ang nirebisang guidelines sa pagbusisi ng Office of the President at Department of Budget and Management para mapalakas pa ang safeguards at maiwasan ang political partisan habang nalalapit ng 2025 midterm elections.
Kasama sa pangunahing safety measures ay ang paglalathala ng mga pangalan ng mga benepisyaryo at mas mahigpit na pagbabawal sa pagsama ng mga kandidato sa pamamahagi ng payout para sa mga benepisyaryo ng AKAP.
Ang AKAP nga ay naglalayong mabigyan ng pinansiyal na tulong ang mga low-income at minimum-wage earners partikular na ang mga apektado ng inflation at mga hamon sa ekonomiya kabilang ang mga magsasaka, mangingisda at mga manggagawa mula sa informal sector para maibsan ang kanilang pinapasang pinansiyal.
