CEBU CITY – Arestado ang isang menor de edad na apat na buwang buntis sa isinagawang buy bust operation sa Osmeña Drive, Tres De Abril, Barangay Labangon, Lungsod ng Cebu.
Kinilala lang ang subject sa pangalang “Eva,” 17-anyos na residente sa nasabing lugar.
Inihayag ni Police Captain Joffrey Grande, hepe ng City Drug Enforcement Unit, na nakatanggap sila ng report kaugnay sa iligal na gawain ng menor de edad kaya agad nila itong isinailalim sa surveillance at nagpositibo naman ang nasabing report.
Nakuha galing kay Eva ang siyam na pakete na pinaniniwalaang shabu na may bigat na 175 grams at nagkakahalaga ng P1,224,000.
Ayon kay Police Capt. Grande, inaalam na nila kung saan kumukuha ng iligal na droga ang subject.
Nabatid na kabilang sa high value target ng pulisya ang menor de edad at nakakulong na sa selda ng Cebu City Police Office.
