Napagkasunduan ng Committee for the Special Protection of Children ang mungkahi ng kinatawan ng Department of Justice (DoJ) na siguruhin ang kaligtasan ng mga kabataan laban sa mga online content na posible nilang ikapahamak.
Ito ay matapos ang kanilang pagpupulong noong Biyernes sa tanggapan ng National Telecommunications Commission (NTC) office na ang layunin ay agad na resolbahin ang kumakalat ngayong “Momo Challenge” na isa umanong viral online suicide challenge na ang target ay mga bata at mga menor de edad.
Sa panig ng PNP, sinabi nilang wala pang reklamo na idinudulog o isinampa sa kanilang tanggapan at wala pang URL o web page na natutukoy hinggil sa naturang challenge.
Ayon kay Department of Information and Communications Technology (DICT) Sec. Eliseo Rio, pumayag na ang Facebook na i-block ang Facebook pages na nagpo-promote ng Momo Challenge at iba pang mga kahalintulad na propaganda.
Sinabi ni Rio na may kapangyarihan din ang publiko na tuldukan ang “momo” threat sa pamamagitan ng pagreport sa consumer@ntc.gov.ph ng ano mang kaduda-dudang mga website na nagpapakalat ng suicide challenges, harassment at iba pang harmful content.
Nangako ang NTC na kagyat nilang aatasan ang internet service providers na agad na i-block ang mga kahina-hinalang URL.
May iba pa aniyang opsiyon ang publiko at ito ay sa pagtawag sa hotline ng PNP na 414-1560 o bisitahin ang pinakamalapit na Regional Anti-Cybercrime Unit o police station para i-report ang ano mang insidenteng may kaugnayan sa Momo challenge.
Sa kasalukuyan ay sama-sama ang lahat ng mga ahensiya ng gobyerno sa pinaigting na information campaign on digital parenting.
Iniutos din ng NTC sa mga internet service providers na agad i-block ang mga kahina-hinalang web pages.
