Inaasahan umanong malalaman na sa mga susunod na araw ang detalye ng pinaplantsang bakbakan sa pagitan nina American welterweight contender Mikey Garcia at Pinoy ring icon Sen. Manny Pacquiao.
Ayon kay Garcia, posibleng ilabas na raw sa mga susunod na araw ang petsa at lokasyon ng magiging laban nila ng Fighting Senator.
Pero sinabi ni Garcia, posibleng mangyari raw ang boxing match sa buwan ng Mayo.
Paglalahad pa ng 33-year-old boxer, matagal na raw niluluto ang laban ngunit mas luminaw lamang ang mga detalye noong nakalipas na taon.
Una rito, sinabi ni Pacquiao na malaki umano ang tsansa na si Garcia ang makakatunggali nito sa kanyang comeback fight.
Pero inilahad ni Pacquiao na posible pa itong magbago lalo pa’t hindi pa rin daw tapos ang diskusyon naman sa kampo ni pound-for-pound king Terence Crawford.
