KALIBO, Aklan—Naghahanda na ang mga kapulisan sa lalawigan ng Aklan para sa seguridad ng mga atletang kalahok sa Western Visayas Regional Athletic Association (WVRAA) Meet 2023 na gaganapin sa Calangcang Sports Complex sa bayan ng Makato, Aklan.
Ayon kay Police Captain Merriefin Carisusa, hepe ng Makato Municipal Police Station na nasa 80% nang handa ang kanilang hanay para matiyak ang kaligtasan ng lahat na sasabak sa iba’t ibang sporting events.
Inaasahang mahigit sa 3,000 na participants at VIP’s ang dadalo sa opening parade ng WVRAA Meet kung kaya’t nakalatag na ang kanilang security plans at may augmentation force din aniyang magmumula sa Police Regional Office VI.
Umapel naman ng kooperasyon ang pulisya sa publiko at sa mga manonood at sundin lamang ang security protocols gaya ng bag checking at body frisking.
Ang WVRAA Meet 2023 ay magsisimula na sa Abril 26 ng kasalukuyang taon.
