Kinumpirma ni PNP Chief Gen. Debold Sinas na nagpadala na ng surrender feelers ang karamihan sa siyam na sinibak na pulis na nasa likod sa pagpatay sa apat na Army intelligence officers sa Jolo,Sulu nuong nakaraang taon.
Ayon kay PNP Chief, nakikipag-usap na ngayon ang PNP BARMM sa mga ito para sa kanilang posibleng pagsuko.
Sa ngayon nasa proseso pa ang PNP sa pakikipag-usap sa mga ito na posibleng magdulot ng positibong resulta at boluntaryong sumuko ang mga ito.
Tumanggi naman si Sinas kung sinu-sino ang mga pulis na nais sumuko.
Nakitaan kasi ng probable cause ng state prosecutors ang sinibak na siyam na pulis sa pagpatay kina Maj Marvin Indammog, Capt. Irwin Managuelod, Sgt Jaime Velasco at Cpl. Abdal Asula.
Nagsasagawa nuon ng intelligence and monitoring ang apat na sundalo laban sa presensiya ng dalawang hinihinalaang suicide bombers.
Nuong January 11, 2021, inamin ni Sinas na kanila ng pinakawalan ang siyam na dati nilang mga kabaro sa dahilang sinibak na sila sa serbisyo at wala ng hurisdiksyon sa kanila ang PNP.
