Personal na binati ni NBA Finals MVP at dating Toronto Raptors superstar Kawhi Leonard si Manny Pacquiao sa kanyang panalo laban kay Keith Thurman upang masungkit ang World Boxing Association (WBA) super welterweight crown nitong nakalipas na Linggo sa Las Vegas.
Sa Instagram post na inilabas ngayon lamang ni Pacquiao, makikitang magkatabi ang dalawa na nakangiti at nakasampa pa ang kaliwang kamay ni Leonard sa kaliwang balikat ng fighting senator.
Kung maaalala sa kasagsagan ng laban ni Pacman sa MGM Grand Garden Arena, ilang agwat lamang ang layo ni Kawhi sa upuan naman ni Jinkee Pacquiao sa ringside.
Si Leonard na naging instrumento sa unang pagkampeon ng Raptors ay bagong lipat lamang sa Los Angeles Clippers sa tinaguriang nabuong blockbuster deal kung saan makakasama na rin niya ang dating Thunder star na si Paul George.
Liban kay Kawhi, personal ding sinaksihan ng retired American champion na si Floyd Mayweather Jr. kung paano pinabagsak ng Pinoy ring icon sa first round ang kanilang kababayan na dating undefeated na si Thurman.
Sa post naman ni Pacman sa kanyang social media ay makikita rin ang emoji na kamay na sumisimbolo sa pambihirang laki ng kamay ni Kawhi.
Kung maaalala nakabalik na kahapon ang only eight division world champion sakay ng special flight ng isang isang private jet at agad na dumalo sa sesyon ng Senado.
Noong Lunes pa sana ang dating ng pambansang kamao pero ito ay nabalam bunsod ng dagdag na checkup sa kanyang mata.
