NCRPO may inisyal ng listahan sa mga pinalayang convicts sa GCTA

May hawak ng inisyal na kopya ang National Capital Region Police Office (NCRPO) ng nasa 1,914 preso na pinalaya dahil sa Good Conduct Time Allowance (GCTA).

Ito ang kinumpirma ni NCRPO chief Maj. Gen. Guillermo Eleazar at sinabing hanggang sa ngayon hindi pa nagbibigay ng opisyal na kopya ang Bureau of Corrections (Bucor).

Una rito, inatasan ni PNP chief PGen. Oscar Albayalde si Eleazar na humingi ng listahan ng mga pangalan at address ng mga pinalayang convicts.

“May initial copy na pero pina finalize pa but wala pa talagang copy handed over sa amin from BuCor,” wika ni Eleazar.

Naglabas na rin ng kautusan si Eleazar sa lahat ng mga precint commanders sa buong Metro Manila para makipag-ugnayan sa mga barangay officials para matukoy ang mga convicts na napalaya dahil sa GCTA.

“They should take advantage of the grace period given to them. President Duterte could have ordered for their immediate arrest but I believe he has good reasons why they were given 15 days to surrender instead,” pahayag ni Eleazar.

Hinimok naman ni Eleazar ang mga convicts na sumuko na lamang ng mapayapa.

Una ng inihayag ni PNP chief Oscar Albayalde na kapag hindi sumuko sa itinakdang 15-day grace period magiging subject for warrantless arrest na ang mga convicts.