Agad na ipinag-utos ni National Capital Region Police Office director PMGen Edgar Alan Okubo na magsagawa ng inspeksyon at imbentaryo sa mga rescue vehicles and equipment ng kanilang hanay.
Ito ay bahagi pa rin ng paghahanda ng kapulisan sa Metro Manila sa posibleng maging epekto ng pagpasok ng bagyong Betty sa Philippine Area of Responsibilty.
Bagama’t tinatayang may malaking tyansa na hindi direktang tatama sa Kamaynilaan ang naturang bagyo, ay inaasahan pa rin ang posibilidad ng malakas na pagbuhos ng ulan na maaaring magdulot ng matinding pagbaha.
Kaugnay nito ay aabot naman sa 710 na pulis na may kaalaman at pagsasanay ukol sa search and rescue operations ang itinalaga ng NCRPO upang tumugon anu mang oras kung sakaling kailanganin na magsagawa ng mabilisang aksiyon o pagtulong sa ating mga kababayan na maaaring maapektuhan ng nasabing bagyo.
Maglalaan din ng 100 pulis na aantabay sa punong himpilan ng NCRPO upang maging bahagi naman ng Reactionary Standby Support Force na magsisilbing karagdagang pwersa kung kakailanganin at handang umaksyon saan mang panig ng Metro Manila.
Kabilang din sa paghahanda ay ang pagkalap ng mga food packs, gamot, at tubig na siya namang ipamimigay sa mga residente at mga pamilyang posibleng lumikas mula sa kanilang mga tahanan upang pansamantalang manatili sa mga evacuation centers.// astr
