KORONADAL CITY – Nasawi ang isang umano’y notoryos na motornapper matapos makipagbarilan sa mga otoridad sa isang Comelec checkpoint sa Lambayong,Sultan Kudarat.
Kinilala ng Lambayong PNP ang nasawing suspek na si Kautin Esmael, nasa legal na edad at residente ng nabanggit na bayan.
Una rito, tinutukan umano ng baril ng suspek si Richard Cerbales at tinangay ang motorsiklo nito.
Kaya’t dumulog si Cerbales sa Lambayong Municipal Police Station at nagsagawa ng operasyon ang mga otoridad laban sa suspek hanggang sa namataan ito sa National Highway ,Barangay Didtaras kung saan may inilagay na Joint Comelec Checkpoint ng pulisya at Sultan Kudarat Highway Patrol Group.
Agad na pinapara ng mga pulis ang suspek ngunit sa halip na sumunod ay binilisan pa nito ang kanyang minamanehong motorsiklo kaya’t nagkahabulan.
Pagdating umano ng suspek sa Purok Pag-asa ay pinaputukan nito ang mga pulis gamit ang dala nitong baril kaya’t gumanti ang mga pulis hanggang sa tinamaan ito.
Naidala pa sa ospital ang suspek ngunit idineklarang dead on arrival ng attending physician.
Narekober sa crime scene ang 2 fired cartridge case ng caliber 5.56mm, 3 fired cartridge case ng caliber 9mm, 1 sling bag na may lamang dried marijuana leaves, 1 unit caliber 45 pistol,1 steel magazine ,3 live ammunition of caliber 45 pistol at 1 motorsiklo.
Napag-alaman na ang suspek ay sangkot din sa illegal drug activities sa naturang bayan.
