CEBU – Inaresto ng pulisya ang nagpakilalang pinsan ng dating kilalang drug lord na nakabase sa isla ng Banakon sa bayan ng Getafe sa lalawigan ng Bohol pasado alas-10:00 ng gabi noong Miyerkules, Marso 16,2022 .
Arestado ang suspek sa Sitio Black Cat sa Barangay Duljo Fatima sa Cebu City sa inilunsad na anti-illegal drug operation ng mga operatiba ng Regional Police Drug Enforcement Unit (RPDEU) -7 .
Kinilala ang nadakip na si Mark Secretaria Duaban, 42, ng Sitio Riverside sa nasabing barangay.
Si Duaban ay pinsan ng sikat na drug lord na si dating Rowen “Yawa” Secretaria na nag-ooperate sa isla ng Bohol at kilala rin bilang dating tao ni Jeffrey “Jaguar” Diaz.
Nakuha mula sa suspek ang ipinagbabawal na droga na tumitimbang ng dalawang kilo at isang 75 gramos na nagkakahalaga ng 14.1 milyong piso ayon sa street drug price.
Napag-alaman ng pulisya na ginamit niya ang cell phone sa pagtanggap ng droga at ginawa niyang drug courier ang isang 9-anyos na batang lalaki.
Nabatid din na tatlong taon siyang naging tao ni Tata Negro hanggang sa siya ay makulong noong taong 2016. – BJR.
