BAGUIO CITY – Arestado ang dalawang katao dahil sa kanilang pagdadala ng marijuana sa Caponga, Tublay, Benguet
Nakilala ang mga ito na sina Jevie Pabia at Rommel Barrientos na kapwa nagmula sa Cavite.
Batay sa report ng Philippine Drug Enforcement Agency (PDEA), nakumiska sa mga suspek ang 20 kilo ng tubular dried marijuana na nagkakahalaga ng P2,400,000.
Napag-alamang nagtungo ang mga suspek sa Bakun, Benguet at babalik na sana ang mga ito sa Cavite ngunit nasita ang mga ito dahil wala silang kaukulang dokumento nang makarating ang mga ito sa Tublay, Benguet.
Naobserbahan din ng mga awtoridad ang kahina-hinalang kilos ng mga suspek kayat isinailalim sa inspection ang kanilang sasakyan sa pamamagitan ng K-9 narcotic dogs na nagresulta upang makita sa kanilang pag-iingat ang mga iligal na droga.
