P374K na halaga ng shabu tiklo sa mag-live in partner sa Capiz

ROXAS CITY – Arestado ang maglive in partner na fruit vendors sa drug buybust operation sa Barangay Banica, Roxas City.
Kinilala ang mga drug suspek na sina Edilberto ‘Toto Boltron’ Laserna, Jr., 31-anyos at Lilibeth Borines, 53-anyos, pawang mga residente ng nasabing lugar.

Sa panayam ng Bombo Radyo Roxas kay PLt. Col. Francisco Paguia, Hepe ng Roxas Component City Police Station, itinuturing na High Value Individual (HVI) sa Drugs Watchlist ng pulisya ang dalawa.

Nakuha sa posesyon ng mga suspek ang 19 na sachets ng shabu, na may timbang na 55 grams at nagkakahalaga ng P374,000 kasama na ang drug buy bust money.

Kasong paglabag sa Republic Act 9165 o Comprehensive Dangerous Drugs Act of 2002 ang isasampa sa dalawang suspek.