Dinepensa ng isang house leader ang naging desisyon ng ilang opisyal ng Gabinete na gamitin ang executive privilege sa hindi pagdalo sa pagdinig sa Senado kaugnay sa pag-aresto kay dating Pangulong Rodrigo Duterte kaugnay ng kasong kinakaharap nito sa International Criminal Court (ICC).
Ayon kay House Assistant Majority Leader Rep. Jude Acidre, Chairman ng House Committee on Overseas Workers Affairs na legal at naayon sa Konstitusyon angpag-invoke ng executive privilege.
Ilang opisyal ng gabinete ang hindi dumalo sa pagdinig ng komite na pinangungunahan ni Sen. Imee Marcos kaugnay sa pag-aresto kay Duterte, kung saan ginamit ni Executive Secretary Lucas Bersamin ang executive privilege bilang dahilan ng hindi pagsipot sa imbestigasyon.
Sinabi ng Kongresista na kanilang nirerespeto ang paggamit ng executive privilege.
Binigyang-diin niya na ang paggamit ng privilege na ito ay hindi bago at hindi kontrobersyal, at ginawa na ng mga nakaraang administrasyon.
Sinabi ni Acidre bilang mambabatas nararapat at ginagalang nila ang pananaw ng Ehekutibo.
Tinukoy din ni Acidre ang kasanayan ng Kamara sa pagrespeto sa inter-parliamentary courtesy.
Nag-aalala naman si Acidre na tila hindi pa handang magbigay ng parehong respeto ang Senado sa kasalukuyan.
Ipinahayag ni Sen. Marcos ang kanyang pagkadismaya sa hindi pagsipot ng mga mataas na opisyal at nagtanong kung sila ba ay natatakot lamang dumalo. Sa kabila nito, sinabi ng komite ng Senado na magpapatuloy sila sa mga pagdinig.
Nanindigan si Acidre na ang mga co-equal na sangay ng gobyerno ay kailangang magbigay-galang sa mga hangganan ng isa’t isa batay sa Konstitusyon.
“Sa kaso ng House, nung nirespeto po namin ang inter-parliamentary courtesy, sana gayundin po ang igalang ng Senado ang Ehekutibo,” pahayag ni Acidre
