Suportado ni Department of the Interior and Local Government (DILG) Juanito Victor ‘Jonvic’ Remulla ang pagpapatupad ng binagong Implementing Rules and Regulations (IRR) ng Republic Act (RA) 10592, na kilala bilang “Good Conduct Time Allowance (GCTA) Law.”
Ito ay kasunod ng mga ulat mula sa Bureau of Jail Management and Penology (BJMP) na ang kasalukuyang rate ng pagsisiksikan sa mga piitan ay umabot na sa 306 porsyento, kung saan ang bilang ng mga Persons Deprived of Liberty (PDLs) ay 117,767 sa 482 na piitan na pinamamahalaan ng BJMP sa buong bansa noong Oktubre 31. Ito ay malayo sa ideal na populasyon ng bilangguan na 33,325, na nagpapakita ng kagyat na pangangailangan para sa mga hakbang upang ma-decongest ang mga bilangguan.
Sa kanyang mensahe na ipinaabot ni DILG Undersecretary Serafin Barretto Jr., binigyang-diin ni Remulla na ang na-update na IRR ay makatutulong sa isang mas makatarungang sistema ng hustisya, na magbibigay ng pagkakataon sa mga PDLs na paikliin ang kanilang mga sentensya kung ipapakita nila ang magandang asal alinsunod sa mga probisyon ng batas.
Kumpiyansa si Remulla na ang binagong IRR ay magdudulot ng mga pagpapabuti sa kalagayan ng mga bilangguan at magtitiyak na ang hustisya ay naipapatupad nang patas at inklusibo.
Ang mga bagong alituntunin ay magbibigay daan sa mas mataas na transparency sa pagbibigay ng good conduct time allowances, at inaasahang makakatulong ang sistema ng “single carpeta” ng BJMP upang masubaybayan ang mga allowance at mapadali ang tamang paglabas ng mga kwalipikadong PDLs.
Dagdag pa rito, ang kamakailang desisyon ng Korte Suprema na ang mga nahatulan ng mga karumal-dumal na krimen ay dapat ding makikinabang sa mga benepisyo ng GCTA.
