Nakikiisa ang Malacañang sa pagdarasal para sa paggaling ni Cardinal Luis Antonio Tagle matapos magpositibo sa COVID-19.
Sinabi ni Presidential Communications Operations Office (PCOO) Sec. Martin Andanar, ikinalulungkot nila ang nasabing balita at nananawagan sila sa publiko na ipagdasal din ang agarang recovery at mabuting kalusugan ni Cardinal Tagle.
Ayon kay Sec. Andanar, hangad nila ang mabilisang paggaling ng Cardinal para maipagpatuloy nito ang mabubuting gawa at pagiging inspirasyon ng mga mananampalatayang Katoliko sa paglaban sa COVID-19 pandemic.
Kahapon, iniulat ng media office ng Catholic Bishops Conference of the Philippines (CBCP) na nagpositibo si Cardinal Tagle.
Si Tagle na dating archbishop ng Manila ay kasalukuyang Prefect of the Congregation for the Evangelization of Peoples ng Vatican.
Iniulat na rin ng Vatican News na kinumpirma ng Holy See Press Office ang positibong resulta ng swab test kay Cardinal Tagle.
Inihayag sa report na si Cardinal Tagle ang kauna-unahang head o pinuno ng Vatican dicastery na tinamaan ng COVID-19.
“We extend our prayers of speedy recovery and good health to Cardinal Luis Antonio Tagle following the unfortunate news that he had recently contracted COVID-19, and entreat the public to pray for the good Cardinal as well,” ani Sec. Andanar. “May his recovery be immediate so that he can continue to fulfill his good works, and be an inspiration to the Catholic faithful to continue the fight against COVID-19 virus and be on our way to heal and recover as one nation.”
