Nakatakdang bibisita si Pangulong Ferdinand Marcos Jr. sa Estados Unidos nang hindi bababa sa dalawang beses sa susunod na taon.
Inihayag ni Philippine Ambassador to the US Jose Manuel “Babe” Romualdez na dadalo si Marcos sa ikalawang Summit for Democracy, na nauna niyang sinabi na maaaring gaganapin sa Hunyo 2023.
Pinangunahan ni US President Joe Biden ang unang Summit for Democracy noong Disyembre 2021.
Sinabi ni Romualdez na ang US ay magho-host din ng taunang pagpupulong ng Asia-Pacific Economic Cooperation sa susunod na taon.
Kung maalala, ang huling pinuno ng Pilipinas na bumisita sa Washington ay si Benigno Aquino III, na pumunta sa White House para sa isang opisyal na pagbisita noong 2012.
Ang huling pagbisita sa estado ng isang pinuno ng Pilipinas ay naganap noong 2003 nang si dating Pangulong Gloria Macapagal Arroyo ay malugod na tinanggap ni dating Pangulong George W. Bush.
Magugunitang, sinabi ni dating Pres Rodrigo Duterte na hindi siya kailanman bibisita sa Washington kasunod ng pagpuna ng ilang opisyal ng US sa kanyang anti-narcotics campaign, kung saan libu-libong drug suspect ang napatay.
Para sa kanyang unang paglalakbay sa US mula nang maging pangulo ng bansa, dumalo si Marcos sa 77th United Nations General Assembly noong Setyembre.
