CENTRAL MINDANAO – Nanawagan si Pangulong Ferdinand Marcos Jr. sa mga miyembro ng Bangsamoro parliament na magtulungan para sa pagkamit ng kapayapaan at pag-unlad sa autonomous region na pinamumunuan ng mga Moro.
Naging panauhing pandangal si Pangulong Marcos sa inaugural session ng 2025 Bangsamoro parliament, na ang 80 miyembro ay itinalaga niya noong Agosto, matapos ang panunungkulan ng mga nagsilbi noong 2019 hanggang 2022 sa ilalim ni Pangulong Rodrigo Duterte.
Ang parliyamento ng Bangsamoro ay kilala rin bilang Bangsamoro Transition Authority, na ang 80 miyembro, kasama ng punong ministro na si Ahod Ebrahim, ay sama-samang nangangasiwa sa operasyon ng regional autonomous na pamahalaan.
Si Ebrahim ay tagapangulo ng Moro Islamic Liberation Front (MILF).
Si Nur Misuari, na tagapagtatag ng Moro National Liberation Front (MNLF) ay naroroon din sa kaganapan.
May mga miyembro ng MNLF sa parliament, na ang majority bloc ay binubuo ng 41 kinatawan mula sa MILF.
“Hinihikayat ko kayong magpasa ng mga batas sa pagbubuwis, padaliin ang pagsasagawa ng halalan sa 2025 at tumuon sa pangangalaga sa kalusugan at komunikasyon,” aniya sa maikling mensahe sa mga miyembro ng BTA na nagtipon sa 300-seat Shariff Kabunsuan Cultural Complex sa loob ng 32-ektaryang kapitolyo ng Bangsamoro Autonomous Region in Muslim Mindanao sa Cotabato City.
Nanawagan din siya sa mga miyembro ng BTA na panatilihin ang pagkakaisa sa kanilang hanay sa pagpapatuloy ng mga programang pangkapayapaan at seguridad ng administrasyong BARMM.
Nakarating si Pangulong Marcos sa kapitolyo ng BARMM sa timog-silangan ng Cotabato City sa pamamagitan ng Awang Airport sa Datu Odin Sinsuat, Maguindanao, malapit sa headquarters ng Army’s 6th Infantry Division, mga walong kilometro ang layo.
Si PBBM at ang kanyang mga kasama, kabilang sina Senate President Juan Miguel Zubiri at House Speaker Martin Romualdez, ay bumalik kaagad sa Awang Airport pagkatapos ng kanyang maikling talumpati sa kanyang pakikipag-ugnayan sa mga miyembro ng regional parliament.
