Pinag-iisipan ng Office of the Solicitor General na magsampa ng bagong reklamo laban sa China sa Permanent Court of Arbitration, sa pagkakataong ito sa iniulat na pinsala sa mga corals sa West Philippine Sea (WPS).
Ayon kay SolGen Menardo Guevarra, ang OSG ay nasa gitna ng isang ganap na pag-aaral sa mga legal option tungkol sa West Philippine Sea, kabilang ang paghahain ng bagong reklamo sa Permanent Court of Arbitration.
Aniya, kasalukuyan pa lamang silang nangangalap ng mga impormasyon ukol sa nasabing issue.
Unang nagsampa ng reklamo ang Pilipinas laban sa China noong 2013 para sa malawakang pag-angkin nito sa West PH Sea sa ilalim ng nine-dash line claim nito.
Noong 2016, nagpasya ang Permanent Court of Arbitration pabor sa Pilipinas, pinawalang-bisa ang claim ng Beijing, at sinabing walang legal na batayan ang nine-dash line nito sa ilalim ng internasyonal na batas.
Gayunpaman, tumanggi ang China na kilalanin ang nasabing desisyon.
Sa kabilang banda, inirerekomenda ng Department of Justice (DOJ) ang pagsasampa ng mga kaso laban sa China tungkol sa mga pagkakataon ng malawakang pag-aani ng coral sa WPS.
Sinabi ni DOJ Secretary Jesus Crispin Remulla na tatalakayin niya ang naturang usapin kay Executive Secretary Lucas Bersamin.
